(Cebuano poem I've written when I was 17. Sketch made the other day.)
Sa samin, ang kaugalingon, nahikaplagan
Sa mata, ang panagway, nahibatyagan
Kon ugaling isulti, kini ba dautan?
Sa kasayuran, aduna ba gayoy utlanan?
Mga babayeng nagkanda-iya ug hitsura,
aron madawat nga gwapa,
kinahanglan ba magsubay ug usa ra ka porma?
Apan di ba kana imposible sanglit lain-lain kita’g mata?
Tambok- niwang, puti-itom
Tawag ba kini sa katahom?
Taas- mubo, intsik-budlat
Sa kaugalingon, kini ba nagbatbat?
Ang dakong pangutana
Sa akong hunahuna nagdagan.
Ang kaanyag, naa ba gayoy sukdanan
Ngano man sa pangdaut way pugong ang uban?
Angayan ba gayud
aron ang taw malipay,
sa isig-kaingon
kinahanglan mangtamay?
Busa kining sunod nga mga linya
Para kini kanimo…
Ikaw nga puro maot ang nakita
Imbes na ang maayo.
Kung ikaw tambukikay,
Sa mga niwang ayaw panghinaway.
Ug imong lawas bitaw mugamay,
Sa kamera di muundang magpahulagway.
Ikaw pud niwang, ayaw palabi.
Pagbiay-biay sa supang intawn undangi.
Dili tanan gustong maparehas kanimo
Ang uban, sa tinuod, nangandoy mudako.
Kung imong tupad nagmake-up,
Ayaw pagbu-ot.
Nganong masuko man ka?
Wala man siya manghilabot.
Bantay bitaw kung ikaw kaslon,
Make-up sa dagway, imong gamiton.
Ing-lakaw sa altar, ayaw nalang katingala
Imong dagway ug pamiste, mao rang kolora.
Kung imong gaway pirteng taasa
Unya imong li-og hastang habuga
Pagyubit sa mga hamubo ayaw pud anara
Wala sa kahitas-on ang pag-abot sa himaya.
Magpabuwad man ka sa adlaw
o mangnudnod ug chin chun su
Sige lang, padayon.
Kinabuhi man na nimo.
Apan kung ang panit nimo
imo nang nabayluan,
Ikalipay nalang na.
Ayaw na hilabti ang panit sa uban.
Taas- mubo, intsik-budlat, tambok- niwang, puti-itom.
Kinsa man gud gauna-una ug ingon
Nga niining gipares-pares nga pulong,
Ang usa bati, ang usa matahom?
Sama sa akong pag-ila
nga akong dagway “lapad”
Dili kana pagpangdaut
samut dili pagpangandak.
Sa akong pagsaysay niini,
wala akoy gustong ipadayag
Kundi ang yanong kamatuoran
nga akong nawng murag basak: patag.
Dili tanan nga naghulagway sa kaugalingon, nagbagutbot.
Ang uban kamatuoran lang ang gustong ipa-sabot
Nga sa ilang mata aduna silay natataw
Dili kana pagpakaluoy, o pagpakagarbo, o pagpakaulaw.
Tuod ikaw walay korona
O titulo nga ikaw gwapa
Ayaw kana ikabalaka
Kay ikaw, inday, walay susama.
Mahimo nga ikaw wala nanumbaling niining akong gipangsulti
Mahimo usab nga ikaw nahimuot.
Apan sa akong gipangyawyaw, kini’y importante:
“Nga ang sukdanan sa kaanyag ikaw ang magbuot.”
No comments:
Post a Comment